Gent.mo dr. Carchidi, ho visto che giorni fa ha ripubblicato la mia poesia “Su matrimmoniu un sa di fari”. Oggi che il NO ha vinto e a larga maggioranza vorrei che la ripubblicasse ancora. Mi sembra importante ricordare a chi ha già manifestato in più occasioni in questi giorni il proprio sprezzo per l’esito del Referendum (se in contrasto con il suo volere) che il Popolo è stato chiamato a manifestare la sua volontà e lo ha fatto e anche in modo molto chiaro. Pertanto se non si vuole ridurre ogni cosa che riguarda la politica ad una mera pagliacciata, e interpretare, a mio avviso, una norma dello Stato secondo i propri desideri, il NO è quello che i cittadini hanno espresso e che va accettato.
SU MATRIMMONIO NUN SA DI FARI
di Flaviana Perna
Iu u castrufrancaru unn’u saccio assai parrari e purancu u cusentinu saccio appena mazzicari ca di solitu m’esprimu in un italiano puro ccu grammatica, sintassi e pur a punteggiatura.
Ma a questioni è calavrisi e ci vo u linguaggiu adattu ppe spiegari filu filu pecchì è bruttu su progettu.
E ccussì a Castrufrancu io mo fazzu parrari e u ppecchì di su rifiutu io mi fazzu raccuntari.
Dimmi Castru, ma ppecchì a Cusenza u’ ddici “SI”.
A su punto Castrufranco s’aza cumu nu sul’uomu e ppu grida ca a Cusenza l’hanno ntisu finu u Duomu.
“Tu, Cusenza, mo ccu Renni ti vu uniri in matrimmonio e vu puru spusà a mmia. Vidi tu cchi pandemonio!
Dici ca na città granni tena cchiùassai vantaggi; a mmia para ca sa cosa bona è, ma ppe ri caggi.
Iu mi chiamu Castrolibero, Castrufrancu prima detto; sugnu picculo, pulitu, propiu bellu paesetto. Tiagnu puru li parcheggi tu, Cusenza, ti li suanni, e nemmenu a pagamento, su gratuiti notti e juarni.
Tanta genti di Cusenza è venuta a stari cca e mi dicia ca nun li piaci su connubiu di città.
Iu un dicu ca difetti nun ni tiegnu puru io, ma su pizzichi, quisquillie, si i paragonu a ttia.
Tanti eranu orgogliosi e arricchiti veramente ppe ra storia e ra cultura ca t’ha dato tanta gente; ma pu tu si stracangiata, ex Atene di Calabria, si arridutta c’assumigli a nu cani ccu ra scabbia.
Tu si stata granni assai, ma na vota, tiempu fa; oramai si decaduta! Sienti a mia: lassaci sta.
Tu vu fa su matrimmoniu, ca ti piaci propiu assai, ma in dote cchi mi puarti? Nu dissestu e tanti guai. I bellezze ca tenij tu l’ha tutti ruvinati, ogni chiazza ed ogni via oramai su devastati.
U castiaddru era preziosu quanno dimostrava l’anni, mo è tutto n’atra cosa, cussì bruttu ca ti spagni.
Dintra u jumi c’è na statua ppe ricordo d’Alaricu
ch’è venuto a conquistare ed invece c’è peritu.
Ma l’ha vista cum’è fatta? Ci vo u libro i spiegazioni
ppe capiri certi cosi e nemmenu propiu buoni.
C’è su rre ccu ra curuna azziccato sul cavallo
e sta in piedi tisu tisu ccu ri piedi sopra il collo.
Para ca si vo tuffari dintra l’acqua di su jumi
ma è indecisu e ru cavaddru tena i gammi di bastuni.
Ora, la leggenda dici ca, ppe u minta dintra a fossa
ccu ru rre, l’hanno ammazzato e ppu c’hannu ruttu l’ossa.
U scultore, assai erudito, l’ha voluto raccontari,
ma u cavaddru senza gammi all’impiedi un ci po stari.
Cchi t’ha fattu su scultori, ca di geniu n’ha d’aviri?
Quattru pali dintra a panza c’ha mpizzatu ppe l’azari!
Propiu avanti a sann’Uminicu c’era già na scala beddra;
era antica, puru agevole. Mo c’è na scivulareddra.
Pu na cosa fora luogu, e di cchiù, fora misura:
chiru ponti tuttu jancu ca u sguardu mi cattura,
però no pecchì mi piaci ma pecchì è nu monumentu
ch’è custato na furtuna e un serva propriu a nenti.
Na supposta ppe pinnacchiu all’impiedi u fa restari
quattru machini e nu cammiu ogni juarnu pu cuntari.
T’ha spennutu tutti i sordi, puru chiri ca unn’avia.
Mo ti serva atru denaro e ti vu spusà ccu mia?
Oramai ca si distrutta, ora ca tuttu ha perdutu
vu dividiri ccu mia i disgrazie c’ha patutu?
Tu ti dici cittadina e mi chiami paesotto;
tu si sulu una ruvina. Iu ppe tia nu ternu a lotto.
Però tu un ci sperari, ppecchì l’abitanti mia
paisani vuonnu stari e nun stari nziemi a ttia.
E pperciò nun fari scherzi e nun fari prepotenza
ca u populu è sovrano e ha deciso: No a Cusenza!
FP2024
